hit counter script

تغطية: كلمة لرئيس التيار الوطني الحر جبران باسيل في ذكرى 13 تشرين:

  • عهدنا نبقى هون، لنمنع التوطين، ولنحافظ على ثرواتنا، ولنحارب الارهاب، للتدقيق الجنائي، لحقيقة المرفأ، للامركزية الادارية، للدولة المدنية... عهدنا نبقى هون لنناضل سوا ولنبني سوا لبنان

  • صحيح نحنا والناس كنّا ضحيّة الثورة الكاذبة العميلة، وصحيح الكلفة عالية، بس هيدا الشي زادنا قوّة ومناعة وقناعة... والتيار صار اقوى بتجديد حاله، وبالدروس يلّي تعلّمها، وبالتصحيحات يلّي رح يعملها

  • كلّ عمرها الانتخابات بتصير بأيار وحزيران، وزمن الصوم عند المسلمين بيسمح بإجرائها في 8 أو 15 أو 21 أيّار من دون اي تمديد لمجلس النواب! فبلا تعريض العملية الانتخابيّة لأي تعقيد او خطر

  • حرّضوا اللبنانيين علينا واشعلوا ثورة من ناس صادقين خلصت بلا نتيجة لأنّها تناست الفساد والفاسدين ولأن يلّي استغلوها لا شفناهم واقفين معنا ضد الفساد قبل 17 تشرين، ولا شفناهم بعدها. وطلعت 17 تشرين متل 13 تشرين، هدف الإثنين التخلّص منّا

  • الحل الفعلي لازم يشمل اقرار قانون استعادة الأموال المحوّلة للخارج، الاّ اذا يلّي تحدّوني بمجلس النواب حتّى سمّي مين حوّل، ما بدّهم القانون ينقرّ لأنّو ساعتها القانون واجراءاته رح تسمّي مين

  • نحنا عملنا تفاهم مار مخايل، حتّى الطيّونة وعين الرمانة والشياح وكل لبنان يعيشوا بطمأنينة وبكرامة. كل العالم عم يحطّ ثقله ليفرط هالتفاهم، ونحنا عم نحطّ ثقلنا لنحافظ عليه. ولكن من دون بناء دولة، هيدا التفاهم بيروح منه لحاله، حتّى ولَوْ نحنا ما طلعنا منه

  • رئيس الجمهورية انسب، ونحنا انضربنا وتحمّلنا بس ما بقا نسكت، لكن هالشي ما بيعني اذا حدا سبّنا، منقوّصه!

  • يا حضرة المحقّق العدلي، امّا بتقدر تجيب الكل لعندك، او بتفلّت الأبرياء المسجونين عندك! شو يعني واحد بيخرب البلد حتّى ما يروح على القضاء؟ طيّب ما نحنا بدري ضاهر وشفيق مرعي وحنا فارس وغيرهم، عاملين شغلهم ومظلومين وشجّعناهم يروحوا على القضاء ولهم سنة وشوي محبوسين وما فتحنا تمّنا!

  • كلّ واحد له حق ينزل على العدلية ويتظاهر ويعبّر عن رأيه متل ما اهالي الضحايا عم ينزلوا على العدلية ويعبّروا... الرأي حق مقدّس، بس ما حدا له حق يفرضه على غيره ولا يهدّد ويتوعدّ بالشارع. نحنا مننزل على الشارع لنعلّي صوتنا، مش لنقمع صوت غيرنا

  • التيّار الوطني الحرّ مع استكمال التحقيق العدلي، وكشف الحقيقة ومحاكمة المرتكبين، ورح نواجه يلّي بيحاول ضبضبة الملف

  • نحنا مع رفض التوطين وحق العودة لفلسطين وعودة النازحين بكرامة وامان لسوريا، ومش يستعملوهم ورقة للانتخابات وللارهاب لإسقاط النظام ببلادهم، واذا ما سقط منحلق شواربنا... شو بنا؟ مبين عملنا لحية!؟

  • نحنا خيارنا الآدميّة بوجه الزعران، والآدميّة بدّها شجاعة وقوّتنا بآدميّتنا. نحنا تيار مكافحة الفساد ولو على حسابنا، مش حزب المتاجرة الكلامية بالفساد من دون اي فعل

  • فاهم مار مخايل بـ 6 شباط انعمل لتكون خطوط التماس خطوط جمع بين اللبنانيين المختلفين ومش خطوط فصل من بعد ما سمعنا احدهم بـ 5 شباط عم يقول للناس يلّي عم يكسّروا كنيسة مار مارون انّهم حلفاؤه

  • بالحرب في واحد اختصاصه ضرب المسيحيين وبالسلم، في واحد هو نفسه اختصاصه ضرب المسيحيين بالدستور

  • ما بيكفّي الحراك الهدّام شو كسّر وكيف عجّل بالانهيار وعمل كذبة الثورة وتسبب بتيئيس الناس اكتر وهجرهم؟ ما بيكفّي انفجار المرفأ شو قتل وهدم وتسبب بيأس؟! جايين ترجعولنا صورة الحرب وخطوط التماس... وانتَ ما بتكفيك كل العاب الخارج يلّي لعبتها؟

  • يلّي اجوا على احياء الشياح والطيّونة وعين الرمانة يهتفوا هتافات مستفزة، كانوا بيقبلوا انّو اهالي الضحايا او اشخاص حزبيّين ينزلوا على الضاحية ويهتفوا ضدّ أهلها؟ مش مقبول ابداً السباب ودخول الشوارع الفرعيّة والتكسير. هيدا مش تظاهر سلمي! ولا قتل الناس مشروع!

  • القوي مش يلّي بيحمل سلاح وبيقنّص الناس عن سطوح البنايات؛ القوي مش يلّي بيدّعي حماية منطقته بإطلاق النار من بين اهلها؛ القوي هو يلّي بيجنّب منطقته الفتنة، مش بالخضوع، ولكن بالوقوف بقوة وحكمة!

  • "السلبطة" مرفوضة، سواء كانت من الذين هجموا بلا تفكير او من الذين ادّعوا الدفاع، وقتلوا عن سابق تصوّر وتصميم

  • نقول للجميع ان بناء الدولة وحده يحمي السلم الأهلي وانّ السلاح لا بيمنع الفتنة، فوحدها الدولة هي التي تمنعها، اذا كنّا جميعا تحت جناحها