كلمة الويك آند
سراج الكاز اشرف من وجوهكم السودا ومن تاريخ الكهرباء
هيدا سراج الكاز بتعرفوه وبتتذكروه
وفيكم تلاقو صوره ع الغوغل.
يا نوسو
بشرفكم مش افضل وادفى واحسن من كل ما سمعناه عن الكهرباء تبعكم من ٣٠ سنة منذ وصول الرئيس الرفيق الحريري ابو بهاء، بهاء اللي عم يضوي من قبرص حتى الميقاتي الفقير النجيب اللي الله عطا طول أعلى وأغلى من كل عواميد الكهربا ومش عم تخلوه يفقس لنا لمبة بكواخنا؟
مليار سؤال بعيون اللبنانيين الى:
الرئيس المنتهية ولايته ميشال عون الذي لم يبق لنا اية بحصة بعد والناس ناطرتك وحاملي السلال تتعبيها بحص وخبار
الزعماء وليد بك جنبلاط وطلال بك ارسلان والمرشح سليمان بك فرنجية القابل يوصل ع الكرسي ولو بصوت السيد حسن بس
والى سمير بك جعجع وجبران بك باسيل ومعالي الوزراء والنواب الحاليين والسابقين
نسينا غبطة البطرك والمفتي وسفيرة اميركا وينها راحت معو لمحمد ابن الجوف العوف الأمركاني وتركت الخبيط داير بالعدليات

ارجعوا معي بس حتى الـ١٩٩٢ :
لو تعرفون معنى الجوع مع البرد بالعتمة
بشرفكم وشرف جمهورياتكم الخاصة وشرف زوجاتكم وشرف ولادكم وشرف احفادكم ونسوانهم وكلابكم وبسيناتكم
وبحياة وزراء ومدراء الكهرباء تبعكم من ايلي حبيقة الله يرحمو وصولا الى وليد فياض جارنا في شارع مدام كوري الله يطول بعمرو ويطولو بذقنه....
بتتذكروا لمبة عصا ايلي حبيقة الله يرحمو كان عم يشرحلكم عن شعشعة لبنان والى جنبه رفيق الحريري عن الكهرباء كمان الله يرحمو الذي وعدنا في الـ ١٩٩٢ بالكهرباء ٢٤/٢٤ واخبار البواخر وصورها واصلة قبالة السان سيمون؟
كيف نسيتو المهيب مهيب عيتاني الذي فر الى البرازيل وغلة الكهرباء بجيبتو بدلا من السجن ومثله ومتايل الوزير عبد الحميد بيضون الله يرحمو كمان اللي بدأ من عين التينة عند ابو مصطفى وانتهى بقصر قريطم عند الرفيق؟
شو نسيتو جورج قمر ورياض شديد ونبيل مزهر وميشال دمعة وسامر دوغان والوزير ابن الصحناوي وبنت البستاني وماذا نعد لنعد لكم بعد من اسماء نسيتمونها وذبحتنا في جمهورية العتمة.
من ٣٣ سنة بتوعدونا بالكهرباء والدفى عفا الله عما مضى من كوارث .
بتتذكروا مصباح الناطور الله يرحمو وبتتذكروا الوزير محمد يوسف بيضون اللي علق لمبة على صورو مرشح ع الانتخابات النيابية في شوارع بيروت؟
اكيد بعدكم بتسمعو بـ كمال الحايك اللي حيك بالمكوك عواميد الكهرباء.
وبتسمعو بالهيئة الناظمة. بتحداكم تشرحولنا شو هي؟
ما قرفتو بعد من اللحظة اللي انوجد فيها لبنان ولا حدا بيحمل اللي عم تحملو يا اللبنانيي.
شو ناطرين بعد
اي نوع من البشر انتو يا شعب لبنان العظيم؟
تصوروا كل هم الوزير الحالي يوظف جيوش من الجباة بعد ما لغا توطين الفواتير تبع الكهرباء بالمصارف ويبعث الجباة للدخول الى بيوت الناس وتدفيعهم الفواتير .
متى توقفوا الدفع ولو فرنك واحد لهذه الدبلة؟
تعوا مصوا … دماء بقايا شعبكم يا...
نسر حرمون