في خطوة رائعة وراقية تنم عن الثقافة وتقدير الثقافة اللبنانية، وفي الصالون الثقافي في كازينو لبنان كرم الإعلامي روبير فرنجية الكاتب والشاعر الكبير الراحل يونس الإبن في صالة المارتينغال في كازينو لبنان، افتتح الحفل بكلمة ترحيبية للسيدة رنا وهبه وكلمة للأستاذ روبير فرنجية، والقى الوزير مكاري كلمة شكر فيها المنظمين وخطوة التكريم، كما القى السيد روني الفا كلمة باسم وزير الثقافة. وقد القت زوجة الراحل السيدة نجيبة يوسف الابن كلمة مؤثرة شكرت فيها الأستاذ روبير فرنجية والمنظمين وتناولت عطاءات زوجها، وقد القيت كلمات أخرى للسيد جورج وديع الصافي والسيد أنطوان الصافي الذين قدما غناءً منفرداً والقى السيد جورج الصافي كلمة بالراحل، كما غنت السيدة دورا بندلي اغنية "عنا جار" بأداء رائع، والأستاذ مارون نمنم لأغنية من كلمات الراحل.

جرى عرض لوثائقي رائع مدته حوالي ال 40 دقيقة عن يوسف الابن وهو من اعداد الإعلامي روبير فرنجية وإخراج الياس عبود، وقد قدمت الحفل الإعلامية ندى صليبا.

إشارة الى ان الحضور اقتصر على حوالي ال 70 شخصاً بحضور الوزير زياد مكاري، والنائب طوني فرنجية، إضافة الى شخصيات فنية وإعلامية وعائلة يوسف الابن.

وكان لفرنجيّة خلال التكريم، كلمة جاء فيها:

"مسا الخيرات، أبو لبنان ولبنان يا قطعة سما عم بيتكرم بكازينو لبنان ، اللي عندها صالة سفرا ومسرح وملهى ومطعم وصالون ثقافي.
اللي كتب نهر الوفا كان بيعرف انو الوفا بعد الغياب جفاف وعتاب والنهر ما بيتدفق إلا من سواقي الحب والتقدير من السواقي المزيارة لكل ضيع لبنان.
يونس الابن يا ابن مزيارة الزغرتاوية اللي كان بدها اليوم تزحف من حميص والحرف لتكرم اللي ندر حالو للكلمي الحرة وللحرف .
قلنالن عذرونا القاعة بتساع سبعين محب ويونس بكل ضيعة بلبنان عندو سبعين بيحب : لبنان يا قطعة سما .
يا استاذ الاساتذة :
تغير لبنان والسما بعدك .
غنيتك لوديع الصافي " لوين يا مروان عمهلك " صارت لكل المراونة سنة وشيعة ودروز وارثوذكس وموارنة : لوين يا مروان ناطر الفيزا عمهلك .
ركبلك بقارب من قوارب الموت ولا تفكر بوجع أهلك .
يا استاذ يونس :
غنيتك ابانا أبانا عم منصليها ليلي صلينا وجلدنا مية مرة وبالكاد مرة سلام وأبانا ليلي حمانا ، وغنيتك “ يا رايح عضيعتنا يطول عمرك ما تطول " صارت رهن محطات البنزين اذا بترفع خراطيما أو بتفول .
يا استاذي لا عم بتشائم ولا عم بفول .
ليش نجيبة مرتك ما خبرتك بالكورونا كيف شقلبنا غنيتك " وينك يا جار شرفنا عالصبحيه القهوي عالنار عم بغليها بايديي …
صارت الغنية : وينك يا جار لا تشرفنا عالصبحيه الكورونا موتت كتار ومش ناقصنا خبرية .
يا شاعرنا الكبير عنا جار ليل نهار وما عدنا نعرف مين الجار ومين صاحب الدار .
الكبي اللي كانت عرس الاحد ومسامير الركب صارت متل الكافيار مأكول الزوات وبعدو صوت دنيا يونس عم بشهينا كل ما صدح : وحياتك يا ستي محبي كباتك من أطيب كبي .
اليوم رح نتفرج على ايديك اللي كتبو هالروائع بالطرب والشعبي والمونولوج .
اليوم لو فينا متلك نختصر خطاباتنا بأربع خمس كلمات .
اليوم تجمعنا هون بالصالون الثقافي بكازينو لبنان لنقلك مع الصبوحة : يسلم لنا لبنان جنة أمانينا ولنسمع أغانيك اللي صارو أغانينا.

شكراً لرئيس مجلس ادارة كازينو لبنان رولان خوري اللي شرع بواب الكازينو لورق الشدي ولورق الابداع وقت الشدي.

شكراً السيدة رنا وهبة على الاحتضان الحلو لهاللقاء اللي فيه وزارة الاعلام اللي كان يونس الابن أحد أعمدة دار الصياد ، ولوزارة الثقافة اللي تركلا يونس الابن ثروة أدبية بتوازي ثروات أقطاب الثراء بالوطن.

بشكر المنتدين والمطربين والعازفين ومقدمة الحفل والحضور ولرفيقي بالعمل المخرج الياس عبود تذكر هالكلمتين اللي قالن يونس الابن : الله يساعد الله علينا و…شكراً".