hit counter script

مقالات مختارة - زياد الرحباني

يا أمّا فِلّ يا

الإثنين ١٥ تشرين الأول ٢٠١٤ - 07:57

  • Aa
  • ع
  • ع
  • ع

الاخبار

يا أمّا فِلّ يا يا أمّا ضَلّ وافْقاع
يا أما حِلّ يا يا أمّا لِفّ وارْجاع
إنتَ المِشْ زابِطْ كيف بَدّها تكون زابْطَة الأوضاع

ماشي التِدْفيش روح شَهِّل سَبَقوك اسْراع
إذا أضْعَفْ مِنّك سِبّو إذا أقْوى زِمّ وارْكاع
إذا عَلّوا سِعْرُن وَطّي إذا رِجْعوا نِزْلوا اطْلاع
إنتَ المِشْ زابِطْ كيف بَدّها تكون زابْطَة الأوضاع

دايماً لبنان هيك هِايْ وَيْنَك حاكيني لَيْك
حاجْ بَقى حَقّ عالريِّس وْعِيفَك مِن حَقّ عالبَيْك
مين جابْ الريِّس يا ريِّس إنتَ والحَقّ عليك
تْلاتْ مْلايين بَيْك هَايْ شِبَّيْك لِبَّيْك
واسْمالله حَوْلَك لا حَوْلَك لا حَوْلَ ولا حْوالَيك

على دلعونا وعلى دلعونا فِتْنا بدُوَّيْرَة إخِت مَلْعونَة
على الماني وعالماني ما تِحْكي إلاّ بالـMoney
على الماني وعالماني صَدِّقني ما في شي تاني

وُصْلوا الجَرايِد شُوفْ نَقّيلَك شي جَريدِة
هَجّيلي كِلّ الحروف رَكِّبْلي جِملِة مُفيدِة
ضَرَبَ قَيْسٌ عَمْرَ في شارِع الحَمرا
مبارح كان عيد الجَلاء وبُكرا عيد البَقَرَة

يا سايِح مَيِّل فُوت شَرِّفْنا في بيروت
مِش باقي هِرّ لا والله وطالِع إيجار البْيوت
هاي ماتوا العالَم كِلُّن وقال بَلَدي ما بيموت
رَحّ قِلَّك مين ما مات هالليرة ما بتموت

بَدَّك شاورما في بَدَّك Fish Finger في
وعِندَك إشعاع ونور لَوْ زَعَجَك فيك تطْفيه
والعمر بيمْرُق ضايِع أبداً ما بتشْعُر فيه
وْلَشو أوروبا دَخْلَك حتّى أميركا، تْفِيه!
بأوَّل طيّارة اقطاعْ بتِتْسَلّى بِشَرَفَك تاعْ

* * *

قد ما صار فيه أصناف وأشكال وموديلات للاقلام ولكل شي بعدو بيستعملو الانسان للكتابة، ليك الواحد قديه بيكتّر اقلام وبيقلل كتيبة... يا حبيبي.
طبعاً هيدا شو بيقولولو؟ هيدا بيقولولو الغاية يلّي لعنت اختها الوسيلة.

  • شارك الخبر