2018 | 03:59 شباط 20 الثلاثاء
قائد الجيش: لن يوفّر الجيش وسيلةً متاحةً للتصدي لأي عدوان إسرائيلي مهما كلفه ذلك من أثمان وتضحيات | سجن أميرين من الأسرة الحاكمة في الكويت لمدة 5 سنوات بتهمة إهانة رئيس مجلس الأمة | قتيل وجريح في حادث صدم بطرابلس |

وفي ناس...

رأي - الخميس 01 تشرين الثاني 2012 - 07:18 - غريس بعقليني

مع تحياتي القلبيّة للشاعر منير بو عساف حين كتب عذب الكلام، والملحن سمير صفير حين غنّى أجرأ المعاني، استوحي ممّا كتب وتغنّى على طريقتي:

بالأبيض والأسود بلّشت الحكاية،
دمعة، غمرة، شمعة، ورواية.
ولما انخلطت الألوان
رجال ولاد ومعن النّسوان،
ما عاد الفرز عنّا وارد
وصار الحامي مصقّع بارد
والكنّا نعرفلو لون،
احترنا معو ومن ربّك العون.


عالأبيض والأسود وعينا
يوم الك ويوم عليك، مهما شقينا!
ولما تعوّدنا على الإيقاع
مشّينا الحال وقبّينا من القاع،
نفّس الدهر غضبو فينا
وصار علينا علينا وابتعد المينا،
ولقينا حالنا نزول نزول
وعلى القاع ردّنا وتحت بقينا!


بعد البحث والتّدقيق،
بيطلع هالحكي "مو دقيق"!
مش مشكلة القدر انك اسأت الإختيار
معن يا محلا "ساندي واندرو" بالإعصار
في ناس، هي بوجودها غلط
العمر كلو معن "انقلط"
ركّبوا جوانح للوفا
وطيّروا معن المشاعر والدّفا
سرقوا من الجفن الغفا
وبدل ما تبقى ضرباتن بالقفا
صاروا يسكروا عا حزنك بجفا!

وفي ناس انت وبعيد عنن اميال
هواهن لصوبك بيبقى ميّال
من دون ما تتعب او تفتح مجال
عا ايقاعك بيرندحوا الموّال
بلكي شي نغمة تايهة بتوصل
وعا قلبك بانسيابية بتنوصل.

مش صحيح انو النّاس قالب
قول قوالب، قول مخالب،
قول سكاكين، قول دكاكين،
قول بيع وشرا برخص الأسعار،
قول معتّر يا قادمي كيف صرت بآخرة النهار
تنفّخ عاللّبن بخوف المنهار
عا قد ما انجبلت زفراتك بالنّار.