hit counter script

- داني حداد

أفكار...

الإثنين ١٥ تشرين الأول ٢٠١٢ - 07:37

  • Aa
  • ع
  • ع
  • ع

فكرة رقم واحد:

شو بها جملة "كوني جميلة واصمتي"؟

إنّو بيكفّي إنّا حلوي. مش ضروري اتناقش معها لا بالأزمة السوريّة ولا بمطامع الغرب بثروات المنطقة. ما بيهمني رأيا بسلسلة الرتب والرواتب. ولا بيهمني تحليلا للأزمة الاقتصاديّة باليونان. ما بدّي حسّ، أصلاً، إنّو شربل نحاس عايش معي تحت سقف واحد، ولا الهموم والهواجس الوطنيّة نايمي معي ع ذات المخدّة. ليش في أحلا منّا هيدي، إنّا حلوة وساكتي؟ والله عجيبة إذا بتصير...

 

فكرة رقم 2:

فيك ما بقا تعيّطلي "يا خيّي". إنّو عيّطلي يا صديقي، يا رفيقي. وْلَك عيّطلي بإسمي. بس بلاها هيدي "يا خيّي". إنّو مش مظبوطة تقولا لشي خمسين واحد بالنهار.

أمّا حضرتِك، إذا بتريدي، ما بقا توزعيلي كلمة "حبيبي" عالطالع والنازل. إنّو معقول واحد تعرّفتي عليه من نص ساعة تعيطيلو "حبيبي"؟ إنّو شو تاركة لبعدين، ومن وين مخزني كميّة هالحبّ كلها؟ ولَك عيطيلو بإسمو، وهيدي حبيبي خليها لحبيبِك بسّ.

 

فكرة رقم 3:

والله بعرف إنّو الوضع الإقتصادي مش منيح، وإنّو في غلاء معيشة، وإنّو صار كل شي مكلف. بعرف هودي كلّون، ما أنا شو بشتغل. بس فيك تقلّي كيف كباية عصير ليمون طبيعي ما بتساع أكتر من 3 ليمونات، بتنباع بحقّ 10 كيلو ليمون؟ إنّو هيدي لا بدّها شيف مطبخ آخد شهادات وعندو خبرة طويلة وعريضة، ولا فيها خلطة عجيبة مش موجودة إلا بهالمطعم. كلّها عصرة ليمون، ومش داخلها شي تاني. هيدا مش ليمون، هيدي سرقة، وبلديّة أكتر من الليمون.

 

  • شارك الخبر