- داني حداد
أهضم شي...
الأحد ١٥ أيلول ٢٠١٢ - 23:32
ثمّة أشياء يصادفها الإنسان في الحياة، ربما تزعجه أو تؤلمه. ولكن، حين يتذكّرها بعد فترة من الزمن يجدها "مهضومة". و"المهضومة" هنا مشتقّة من "الهضمنة" لا من الهضم. ولكي يُفهم كلامي أكثر، أورد في ما يلي بعض الأمثلة عن أمورٍ صادفتني أو صادفت أشخاصاً أعرفهم، على أمل أن يجدها القرّاء "مهضومة" فعلاً، وإن لم يفعلوا فربما تكون العلّة فيّ، أو، بصراحة تامة، العلّة في القرّاء.
(بالعاميّة)
أهضم شي بس يتلفنلك حدا ولمّا تجاوب بيقلّك "إيه نعم".
أهضم شي إنو بالمسلسلات اللبنانيّة ولا إمرأة بتعرف إنّا حبلي إلا بس تراجع.
أهضم شي، كمان بالمسلسلات اللبنانيّة، إنّو بس واحد بدو يتنكّر بيحطولو شعر مستعار بس... وما حدا بيعرفو حتى عيلتو أوقات.
أهضم شي يللي بيقلّك أنا مش مع حدا، وبعد كلمتين ببيّن إنّو مع حدا... ومكتّر.
أهضم شي وقتا تكون قاعد بالبيت وميّت عطش وما إلك جلادي تقوم تشرب، وشي إنّو يللي قاعد معك بالأوضة يقوم عن الكرسي تيعمل شي بتقلّو جبلي معك ماي.
أهضم شي إنّو يكون في عندك "رفقا" على "الفايسبوك" بيحطّولك، ما بعرف ليه، إنّو هلّق عم ياكلو وبيحطّولك كمان صورة الصحن. هودي شو مفروض ينحطّلن تعليق؟ أصلاً هودي مش مفروض يكونو رفقا. وإذا عندك منّن، عزيزي القارئ، شيلن. هلّق، شيلن.
أهضم شي بس تتلاقى بواحد وبيشدّ ع عيونو هوّي وعم يتذكّر إسمك ويتذكّر من وين بيعرفك، وبعدين بيقلّك مشتقلك كتير.
أهضم شي بس واحد يسألك "شو في ما في؟".
أهضم شي بس تكون عالطريق بإنطلياس ويوقفك واحد ويسألك كيف بيروحو عالنبطيّة؟
أهضم شي وقتا تكون رايح تستقبل حدا بالمطار وفجأة يوصل حدا تاني بتعرفو ويفكرك جايي تاخدو.
أخبار ذات صلة
