شريط الأحداث
ميلاديّات (2): "قبل كم ساعة..."
الأربعاء ١٥ كانون الأول ٢٠٠٩ - 08:31
رسالة بالعاميّة الى الطفل الذي سيولد بعد ساعات:قبل كم ساعة من عيد ميلادك في كلمتين حابب إحكين معك. قبل كم يوم من عيد ميلادك، الزينة ملّت الشوارع. أشجار مزيّنة، بكلّ الألوان. مغارة كبيرة، مغارة زغيرة. عم بيبيعو مغارة بيت لحم متل ما هيّي، وعاملينك طفل أشقراني وعيونك زرق.قبل كم ساعة من عيدك في أهل فقراء، متل أهلك، عم بيخبرو أطفالن أخبار عن بابا نويل يللي ما رح يجي هالسنة، "لأنّو عزّبتو الماما، وما درستو منيح...". حرام الاولاد. حرام هالاولاد.إنت بتعرف إنّو عيدك بيعملولو حساب بالدورة الإقتصاديّة. بتعرف شو في بزنس ماشي من ورا عيد ميلادك. وشوفي هدايا وبطاقات معايدة بتروح بهالمناسبة، وبأكتر الأوقات بينسى يللي بيبعتوها إنّو المناسبة عيدك إنتَ.قبل كم ساعة من عيد ميلادك، بدّي قلّك إنّو فَونَسو عيونّا من زينة عيدك، وانطوشنا من الموسيقى ومن الأغاني يللي بتتكرّر من سنة لسنة.قبل كم ساعة من عيد ميلادك، بدّي قلّك إنّو صار لازم تجي إنت شخصيّاً، بلحم ودم، مش بتماثيل الجفصين والبلاستيك. لازم تجي لأنّو الزينة الحلوة مخبّاية بشاعة وحقد واستغلال وكذب.لازم تجي... ناطرينك... عجّل... بعد في كم ساعة قبل عيد ميلادك.
