hit counter script
شريط الأحداث

خاص - ثريا مونتينيغرو

ثريا: ما بيعرف يسوق أو يخلي غيره يسوق أو يخلي قانون السير يطَبّق!

الإثنين ١٥ كانون الثاني ٢٠١٨ - 06:08

  • Aa
  • ع
  • ع
  • ع

نانديتو،

يا عيب الشوم شو تافه إنت! عطلان هم الاحتباس الحراري وعم تفكر ليل نهار كيف بدك تلاقي دواء للسرطان وفي شعب بإمه وبيو عنده مشكلة أكبر وأخطر وأعمق وأهم بتهدد السلم الاهلي والامن القومي مش بس المحلي بل العالمي كمان! هيدا الشعب هو الشعب اللبناني ومشكلته بسيطة كتير.. ما بيعرف يسوق أو يخلي غيره يسوق أو يخلي قانون السير يطَبّق!
شعب بيتزاكى بالسواقة إذا شي.. يعني واحد رقم سيارته أغلى من حياته كلها ع شوي بيكسر عليك وبطاحش تيقطع نص ربع ملم.. بس إنه هوي قبضاي!
أو شي تانت Tante ناتعا اكيد جيب آخر موديل مش عارفي تسوقو! موقفي السير تتوصل العجقة من بيروت لحاجز المدفون بس إنه سافا معليش.. البراستيج ما بخلينا نسوق شي ع قدنا! مش كول ما جيب جيب "audi" بس تكون tante تانيه معها جيب "Porshe".. سوري قصدي Pogshe!
والأحلى بس تشتي الدني، قصدي تنقط، هونيك ببلش البانيك! شتي يعني لازم لازم لازم نعجقها! شو السبب؟ الله وحده بيعرف بس خلص إنه هي نقطت!
في عندك أكيد يلي بدو يفتح video call هو وعم بسوق أو يلي بدو يحكي صاحبته قبل ما يوصل على البيت عند مرته أو يلي بدا تفتفض عواطفها لرفيقتها يلي معها! بعتقد اللبناني مغلط بمفهوم السواقة ومفكرا app لـsocizaling!
وما فينا ننسى انتحاريي الطريق! يلي بحب يقطعوا بالعرض أو بكون الجسر فوق راسهن أو توب موديل يلي مضيعها بين CATWALK والشارع فبتتغندر ع مهلا!
وأكيد بطل الشاشة اللبنانية الشاب الجغل ابو كرش يلي بحب يعرضلنا قوته وعضلاته على الموتو، فبيكسر شمال ويمين وبيطلع وبينزل وبالاخر إذا فتت فيه الحق عليك لأنه قانوننا بعدوا من ايام بندق بو فتيل!
وبقولو ليش في حوادث سير هلقد؟! ليش في قتلى وضحايا هلقد؟! ما قبل منظبط طرقاتنا ونطبق قوانيننا لازم نظبط أخلاقنا بالسواقة!

 

  • شارك الخبر