نانديتو،

مش رح افقع ابيخ نكتة بتنقال كل سنة وإنه رح شوفك سنة الجاي، بس يلي رح قلك ياه شوي من توقعاتي لعام 2018! شو ماغي فرح أحسن مني؟!
توقعاتي إنه بدل هبل اللبنانيي يلي بيعيدو NYE-2 و+1 وما بعرف شو، رح يصيرو يعيدوNYE-30! أسلب يبلشو يعيدو قبل شهر! هيك المطاعم بيستفيدوا اكثر من سرقة العالم من ورا صغر عقلهن! ولاو، عيب نسهر بمحل بياخذ اقل من 300$! نحنا كتير كول!
توقعاتي يصير في جمهورية Influencers وبراندز والفرانشي بيبول، يعني رئيسة جمهوريتهاMlle Fashionista ، اللباس الرسمي من عند جارتنا شانيل وإبن عمنا كريستيان، واللغة المعتمدة الفرنسي المكسر! يعني salut cava? Oui et toi.؟ وإلا إنت منبوذ ومش قد المقام تقعد معنا!
توقعاتي زحفنا لقادتنا يزيد وهبلنا يكبر مع الانتخابات! يعني ما كتير نعيش حلم التغيير الكبير، لأنه هنّي هنّي كانوا ورح يبقوا!
توقعاتي إنه ما حدا رح يبقى "ويك أند" بلبنان، لانه السفر صار أرخص وأريح راس! فبشوف عجقة سير خانقة بالمطار، من الجمعة ليلا للاحد ليلا!

توقعاتي تزيد نسبة الولادات بلبنان لسبب بسيط كتير! زيادة عدد الخيانات! يعني يلي كانوا يستحيوا شوي قبل رح يموت هيدا الخجل، خصوصا بشهر شباط!! الحب العابر للقيم الاخلاقية والطاهرة رح يفقّع مع الدببة الحمر يلي بتلعّي النفس والورود المكتوب عليها JE TAIME ، "cliché" اللبناني ونشرها على انستغرام وستيل شوفيلي جوزي قديش بحبني لا شوفي جوزي انا قديش بحبني وبالاخر جوزها بحِبّلا رفيقتا اكترّ!

توقعاتي إنه رح يتم الكشف عن شبكة، هي الاكبر بتاريخ البشرية، من عدد الرجال يلي بيستعملوا الفايسبوك في لبنان تيضهروا ع نسوانن! ومتل العادة، المرأة بتسامح وبتعمل حالها ما شافت شي بس أكيد بشرط يجلبها RANGE ROVER الجديد.
توقعاتي إنه موضة Brunch الكلاس تبع لتلتة النسوان رح تزول وتجي محلها tea time مع زواج الامير هاري! فكل امرأة بتنتع MAKEUP والشعر من عند الارتيست وتيابها من عند designer تتبلبش حفلة البرش! والله يستر من خربان البيوت!

توقعاتي ينقلب السحر ع الساحر! صار لازم يوعوا البنات والشباب بقى لوين رايحين! حلو السهر إيه وحلوة الحياة إيه والثمن! CREDIT CARDS وديون وتجميل، شي بروس شي بلا روس! وبالاخر! كله صار مسموح وكله صار مقبول وبعدين!