hit counter script

مجتمع مدني وثقافة

لجنة المرأة في مطرانية زحلة المارونية تكافح سرطان الثدي للسنة الرابعة

الإثنين ١٥ تشرين الأول ٢٠١٧ - 17:38

  • Aa
  • ع
  • ع
  • ع

ضمن الحملة العالمية للوقاية من سرطان الثدي، وتحت رعاية سيادة المطران جوزف معوض السامي الإحترام راعي أبرشية زحلة المارونية، أقامت لجنة المرأة في الأبرشية محاضرة توعوية عن آخر المستجدات حول اورام الثدي في قاعة المطرانية ،القاها الدكتور شادي بريدي رئيس قسم الأشعة في مستشفى خوري العام ، والمعالجة النفسية السيدة اليز شبيب ، كما قدمت شهادتا حياة لسيدتان عانين من هذا المرض . قدمت الندوة الإعلامية كريستين زعتر .
إستهلت الندوة بالنشيد الوطني اللبناني، تلاه كلمة سيادة المطران جوزف معوض الذي شكر لجنة المرأة على الدور الكبير الذي تعيشه في رسالتها في الأبرشية , مثنيا على دور المرأة في الكنيسة والمجتمع ، داعيا السيدات المصابات ان يلجأن الى الصلاة مما يساهم في تخطي حالتهن النفسية ....... كما رفع سيادته الصلاة لكل أمرأة تعاني من هذا المرض .
وفي كلمتها السيدة نيفين عزيز الهاشم رئيسة لجنة راعوية المرأة في الأبرشية، تحدثت عن اللجنة ونشاطاتها واهدافها منذ تأسيسها سنة 2014 ، وعن سبب إقامة هذه المحاضرة ، شاكرة كل الذين ساهموا بإنجاحها، خاصة مستشفى خوري العام بشخص رئيستها السيدة ريتا نقولا الخوري التي قدمت الصور الشعاعية، والسيد اسعد نكد لدعم اللجنة من خلال اضاءة تمثال سيدة زحلة والبقاع. كما شددت على ضرورة الاكتشاف المبكر من خلال اجراء الصورة الشعاعية التي امنتها مجانا لجنة المرأة في الأبرشية .
ثم كلمة الدكتورشادي بريدي الذي شرح آخر تقنيات اجراء الصورة الشعاعية والعلاجات المتطورة الموجودة . والسيدة اليز شبيب تحدثت عن الشق النفسي للمصابات بمرض سرطان الثدي وكيفية أحاطت المريض وختمت المحاضرة بشهادتي حياة اثرتا جدا بالحضور كان هدفهما شرح أهمية الايمان للتغلب على هذا المرض وحث السيدات المشاركات على اجراء الصورة الشعاعية . .

والجدير ذكره مشاركة حوالي الثلاثمائة و اربعون سيدة من مختلف المناطق البقاعية .

بعد الندوة توجه الجميع برفقة صاحب السيادة المطران جوزف معوض السامي الاحترام الى مقام سيدة زحلة والبقاع حيث أضاءوا مبنى مطرانية زحلة المارونية باللون الزهري شعار الحملة ، بعد الصلاة على نية شفاء مرضى سرطان الثدي .
كلمة السيدة نيفين الهاشم :

مساء الخير ،
واهلا وسهلا فيكن وبجميع المحاضرين .

هيدي السنة الرابعة على التوالي يلي سوى نحن واياكن عم نجرب نتغلب على هل مرض الخبيث من خلال التوعية على أهمية اكتشافو بمراحلو الأولى .
اربع سنين اكدنا وتأكدنا خلالن انو التغلب على هالمرض اهون بكتير من ما كلنا منتصور وانو التخلص منو ما بيستلزم الا: صورة !
صورة ممكن تشخص سرطان الثدي مبكرا (وهون بشدد على تسميتو سرطان الثدي ومش هيداك المرض لأن الخوف منو صار من الماضي بالنسبه النا) صورة ممكن تكون الحد الفاصل ما بين الحياة و ما بين المعاناة. فتعوا كلنا نتفق انو من بعد كل الف صورة سلفي مناخدها 🙂 ناخد صورة للثدي... وهيك بتضل كل صورنا احلى ..

تأسست لجنة المرأة بابرشية زحلة المارونية بتموز 2014 بدعوة من مكتب راعوية المرأة ببكركي . هي لجنة تابعا للمطرانية ومنحدد روزنامة اعمالنا السنوية بتوجيه واشراف من صاحب السيادة المطران جوزف معوض السامي الاحترام راعي ابرشيتنا ، وبارشاد الأب مروان غانم ، مرشدنا الروحي و داعم كل نشلطاتنا يلي بيعتذر منكن على عدم وجودو اليوم بسبب عرس ببيروت .

تماشيا مع اهدافنا قدرنا من وقتا لهلأ نقوم بعدة نشاطات هدفا الصحة الجسدية والنفسية للسيدة .

من هل منطلق قررنا هل سني كمان ، وبعد نجاح حملتنا بالسنوات الماضية انو نكفي معكن بحملة سرطان الثدي .



لنعرف اكتر عن هالمرض وانتشارو بلبنان لح استعرض معكن بعض الأرقام والإحصاءات :
• 8.3% هي نسبة النساء المصابة
• اكتر من نص النساء المصابة بسرطان الثدي هي ما دون ال50 سنة
• نسبة سرطان الثدي تصل الى 41% من مجمل الاصابات السرطانية لدى النساء و 21% من مجمل الاصابات السرطانية بصفة عامة اي نحو 1800 حالة جديدة كل سنة.

ويحدد الأطباء الاختصاصيون السبب المؤدي لهذا الارتفاع بأمرين: الأول تحسن وسائل التشخيص، والثاني الدور الأساسي الذي تؤديه الصورة الشعاعية للصدر في الكشف المبكر عن هذا السرطان إضافة إلى تحسن ثقافة المرأة في فهم خصائص هذا المرض.
- النسب عالية وما بطمِّن
ولكن اذا سرطان الثدي اكتشف بمراحلو الأولية، نسبة الشفاء منو بتوصل ل 100% وأنا اكبر مثال على هالشي

لهيك حبينا كلجنة المرأة نضوي عا هالموضوع ونشدد على اهمية الاكتشاف المبكر . الصورة الشعاعية السنوية بتقدر تخلصلكن حياتكن .


بال2014 قدرنا نعمل 100 صورة شعاعية ، تبين فين 4 إصابات 3 منن بمراحلن الأولى
بال2015 و 2016 اجرينا 150 صورة شعاعية تبين فين 4 إصابات ، 3 منن بمراحلن الأولى . ومعنا اليوم سيدة عملت الصورة السنة الماضية من خلال حملتنا وجايي تعطينا شهادة حياة .

هون بحب وجه الشكر الكبير لمستشفى خوري العام وللسيدة ريتا خوري بالذات يلي هيي داعمي هيدا النشاط . بس اتصلت فيا وطلبت منا دعمنا كمان هل سني وهي دون اي تردد اكدتلي انو طالما نحن ماشيين بهل مشروع هي داعمتنا ،لانو بالنسبي الها اذا قدرت تخلص حياة سيدة واحدة هيي بتكون كتير مبسوطة .
فمنقلك انت خلصتي حياة 4 سيدات السنة الماضية .
بشكرك والله يبارك فيكي

بحب قلكن كمان انو لجنتنا امنت على مدى سنتين اجراء عملية ترميم الثدي للسيدات يلي اضطروا يشيلو صدرن للقضاء على السرطان بالتعاون مع د. طوني نصار.

وفي العام 2016 قررت وزارة الصحة تغطية كلفة الجراحة الترميمية للصدر بعد استئصال الورم.

بخلال المحاضرة اليوم لح تتعرفو مع در بريدي يلي اغلبيتكن بتعرفو لانو هوي يلي كان عم يعملكن الصورة الشعاعية مت خلال حملتنا على آخر المستجدات حول اورام الثدي . باسلوبو السهل والمبسط رح يغنيلنا معلوماتنا
در بريدي يلي ما تردد ابدا انو يلبي طلبنا ليفيدنا بخبرتو
مع السيدة اليز شبيب رح نستعرض الجوانب النفسية يلي بمروا فين المصابات بسرطان الثدي وكيفية احاطتن واحاطت عائلاتن .

مع السيدة جورجيت أبو خير رح تسمعوا شهادة حياة مؤثرة ورح تخبركن كيف قدرت تتغلب على مرضا بقوة ايمانا .

اما السيدة عيشا الحايك يلي اثرت فيي كتير وشكرتنا لانو عملت الصورة من خلال حملتنا وما كانت حاسي بشي رح تسمعو كمان شهادة حياة بيغلب عليا فرح الانتصار على هل مرض بمساعدة القديس شربل السلام على اسمو .

حبينا كمان متل ما شفتو انو نضوي مطرانيتنا باللون الزهري لنذكر كل السيدات بضرورة اجراء هل صورة الشعاعية .
وبعد المحاضرة رح نتوجه كلنا مع سيدنا جوزف معوض لمقام سيدة زحلة لنصلي عن نية شفاء مرضى سرطان الثدي وسوى منضوي التمثال باللون الزهري شعار الحملي ومتل ما بضوو بكل دول العالم اهم المعالم الاثرية .

هون بحب وجه شكر للسيد أسعد نكد يلي دعمنا بهل نشاط للسنة الثالثة ، وبس اتصلت في لاسالو اذا هل سنة كمان رح يدعمنا بحملتنا ، جاوبني :
" bien sur Nevine , une habitude c’est une habitude “
بشكرك والله يبارك عايلتك

لخبركن شوي عن لجنتنا ونشاطاتنا

نشاطاتنا :
- زيارة سجن النساء والتطلع لحاجياتن ، وتم تأمين بعضا
- حملة توعوية حول ضرورة الاكتشاف المبكر لسرطان الثدي وتأمين الصورة الشعاعية مجانا
- ورشة عمل مع د. ماري خوري عن إدارة الأزمات والتوتر
- ورشات عمل مع د. سمير قسطنتين حول مهارات التواصل وحل النزاعات وفن القيادة
محاضرة في يوم المرأة العالمي حول تحفيز المرأة وتشجيعها على المشاركة في مجتمعها بشكل فعال
- الاحتفال بعيد الميلاد في 2015 مع ذوي الاحتياجات الخاصة وفي 2016 مع أهلنا في البقاع الشرقي . اذ قدمنى الهدايا خلال حفل مسرحي ضم 400 ولد في كل سنة .
- ترويقة خيرية لدعم كل هذه النشاطات
هون بحب نوه بجهود كل الستات يلي لولاهن ما كنتو شفتو هل اعمال الناجحة . هيدي ثمرة عمل جماعي لفريق من السيدات متراص ومحب . بهنيكن

نحن نشاطاتنا الجايي كتيري وعلى عدة اصعدي
خليكن على تواصل مع سيدات اللجنة لتعرفو عنن وتشاركونا فين
بالنسبي لكيفية اجراء الصورة :
بييصلو اذا بتريدو بالمطرانية لنحددلكن موعد تجوا في وتاخدو الورقة
وقبل ما تطلعو على المستشفى لازم تتلفنو تاخدو موعد من د. بريدي بمستشفى خوري العام

سيدنا ، باسم سيدات لجنة المرأة بشكر ثقتكن ودعمكن للجلتنا.
وسوى ان شاء الله منحارب هل مرض .

وأخيرا
بشكر كل وسايل الاعلام والاعلاميين الموجودين معنا اليوم
بشكرك حضوركن وأهلا وسهلا

  • شارك الخبر