أعلنت رئيسة "الكتلة الشعبية" ميريام سكاف، لائحة "زحلة الأمانة" للانتخابات البلدية في مدينة زحلة، مشيرة إلى أنها تجمع العائلات ومكوناتها وتضم الخبرة مع الشباب. وقالت إننا "نطالب بسيادة القرار لأن الأحزاب بحال توافقت الغتنا وبحال اختلفت قتلتنا"، موضحة "إذا لم نتوافق مع غيرنا من الأطراف لا يعني أننا أصبحنا أعداء"، واعدة بالعمل من أجل الإنماء فقط والإستمرار في أمانة الياس سكاف.

جاء ذلك في مهرجان أقامته "الكتلة الشعبية" أمام مقرها في مدينة زحلة، للاعلان عن لائحة "زحلة الأمانة"، وألقت خلاله سكاف كلمة باللهجة العامية، استهلتها بالقول للحضور:

"مسا الخير، كل الخير. مسا الوفا والأمان والأمانة. كنت حدو، بس ولا مرة كنت محلو، هيدي أول تجربة بتأكدلي ع الأرض إنو أيلي سكاف كان جبل، واليوم بغيابو، رح نثبت كلنا سوا، انتو وانا وولادنا وأهل هالمدينة، انو جبل زحلة ما بيتكسر، ويا زحلة ما تهزك ريح، شو ما كان نوعها: أحزاب، مال، فساد وشراء ضمير، بيع قرارات".

أضافت: "جاهزين ونحنا حاملين الأمانة. لأنكن أهل الوفا، تركلكن أمانة. لأنو الصدق صديقكن، تركلكن امانة. لأنو الشهامة ساكنة زحلة، تركلكن امانة. لأنو هوي بيناتنا وما في شي بيبعدو، مدينتو صارت امانة بضميرنا. وأمانتك يا ايلي انو نخلي قرارنا بقلب زحلة، ونوصل صوتا بحناجر ولادا. من هون انطلق شعارنا، شعار اللائحة الي بيحمل عنوان : زحلة الامانة".

وتابعت: "هيدي مش كلمة بتزين طريق، مش شعار لمرحلة بلدية وبس، هيدا خط ونهج ووصية وعهد. وكلنا بيعرف قديه صعبة أنو نخون الأمانة أو ما نكون قدها، ونتشتت وتصير أصواتنا ورقة بتنشرى وبتنباع بسوق المحشورين ع صوت".

وتوجهت إلى روح زوجها الراحل قائلة: "يا إيلي الي فوق، ناسك هون، قدها وأكتر. ناسك من طينة شعب صلب، بيمشي عطريق وبيكفيها، ما بيترك، ما بيزيح. وبيصير أقوى كل ما أشتد التحدي. والي بيجمعنا هوي الثقة الي صارت صعبة ونادرة، لا بل مفقودة إذا عم نحكي عن شخصيات متزعمة لوائح اليوم وجربناها بقلة الوفا مبارح.
وثقوا فينا بالأمانة الي حاملينا. وكرمال هيك كنا أول فريق إنتخابي بزحلة بيتمكن من تأليف لائحة بلدية بلا خلافات، من دون أزمات، بلا عرقلة، لأنو كان قرارنا بإيدينا، ومش محتاجين لنستوردوا من خارج المدينة".

أضافت: "كلنا فخر باعلان لائحة: زحلة الأمانة الي بتجمع عائلات هالمدينة ومكوناتها. وبتضم الخبرة مع الشباب، النضج مع التطور، والأهم أنها على صورة الناس "الأوادم" الي بيكفوا طريق "الآدمي" الأول. ويا ريت فينا بهاللائحة نمثل كل عائلات المدينة. وطبعا بدنا نبدي الأسف أنو في شخصيات ما قدرت تكون معنا لأنو بالآخر محكومين بعدد محدد وبتمثيل لجميع الطوائف. ويا ريت كلن بيكونوا معنا، بس الأكيد انو كلن بقلبنا".

وقالت: "قدرنا توافقنا ع أسمائنا بلا ما نستشير أصحاب القرار من برا. قدرنا نرسم خط إنمائي بدو يشتغل لصالح المدينة، وبيتعامل معها كأنها جمهورية مستقلة عن الاحزاب ومش عن الدولة. عم بنطالب بسيادة القرار، نعم، لأنو الاحزاب إذا إختلفت قتلتنا، وإذا اتفقت الغتنا.
ومع هيك، ومن حرصنا على انو نكون سوا، حاولنا جهدنا نروح عالتوافق ونلم شمل المدينة، لكن المعادلة ما بتمشي على قاعدة الغاء أو تحجيم أحد أهم مكونات نسيج المجتمع الزحلي وهوي، قولولي انتي شو هوي: الكتلة الشعبية يلي عمرها بيفوق أعرق الاحزاب، الكتلة الموجودة بضمير ووجدان زحلة".

أضافت: "مين من الاحزاب رح يعرف شو بكن؟، مين عاش مع وجع الناس يوم بيوم وحتى من دون ما يكون بالسلطة؟، مين رح يكون ضمير حي ليقول كلمة حق ويقود زحلة إنمائيا ع فرد قلب واحد؟، مين غير الكتلة الشعبية بيهمها همومكن؟، مين غيرها هالكتلة الي كلها إيمان بالله وفيكن، وما بتحتمي بالرب بهدف السطو ع الأرض؟".

وتابعت: "ع كل هالعناوين بنلتقي. وإذا ما توافقنا مع غيرنا من الأطراف مش يعني صرنا أعداء. هيدي مرحلة إنتخابية مسموح فيها إستعمال كل قوتنا، بس مش بالطرق السودا".

وقالت: "يا أهل زحلة: هلقد صارت الخيارات واضحة قدامنا، أو بنكون قادرين على صنع قرارنا هون وع أرض هالمدينة، أو بيصنعولنا ياها وبيجبوبها معلبة وجاهزة وما علينا إلا نقول: سمعا وطاعة. نحنا شفنا بمرحلة التحضير اللوائح وتحالف الاحزاب كيف كانت الأمور عم تندار من خارج حيطان المدينة. شفنا لمن اختلفوا كيف احتكموا لمعراب والرابية وبكفيا. وصاروا متل ولاد، بدهن حكم يوقف بيناتن.
بيكفي، وفينا نقول للكل انو زحلة عاصمة قرارها. نحنا الي بنصنع كلمتنا، لانو بنعرف وجع مدينتا. عم بتلمسوا يا أهل زحلة انو خلافاتن عميقة. وإذا اتفقوا اليوم بالاكراه ممكن بكرا يرجعوا يغيروا رأيهن. شو بيصير ساعتها بالمجلس البلدي؟، كيف بيقدر ياخذ قرارات وهوي ع خلاف؟، بتعتقدوا انو كل ما بدنا نحل مشكلة بدنا نعلن اللجوء لمقر سياسي؟".

واستطردت: "هون فينا نعتمد اللامركزية السياسية بالقرارات. فينا نحل مشاكلنا بايدنا من دون ما تتحول لأزمات وتصير خاضعة للتفاوض والبازار بين الاحزاب. ومين قال أنو رح تكون زحلة الاولوية بحساباتن؟، مين قال مش رح يبيعونا عند أول مكسب سياسي بيصب بمصلحتن؟".

وأردفت: "ومن هون يا ابناء زحلة لازم نرفع راية الامانة. الامانة الي تركلنا ياها إيلي، انو نخلي صوتنا بخدمة قرارنا. ونرفع هالصوت ب 8 أيار. ونقول للكل: شو هم زحلة من هدير الأحزاب. ونعلن الولاء لهالمدينة مش للمقرات السياسية. أنتو المقر، وممنوع تكونوا ممر. انتو قرار، مش ورقة إنتخابية للمزاد. انتو الي ما بيمرق من حدكن الفساد. إنتو ولاد زحلة، جيران الوادي، ورفقاتو ل إيلي سكاف يلي وقف بوج كل مين حاول يغير معالم زحلة، تصدى وتحمل وخاض معركة ضد زرع السموم بهالمدينة".

وختمت: "اليوم، الاسمنت صار ناس متعددة الوجوه، ومعمل الموت صار مرشحين، وصار سرقة قرار. وعدنا الكن انو نشتغل للانماء وبس. وانو دربو نكفيها، وشمسوا تسطع فينا، وامانتو نسلمها لأهل زحلة الي رح يكونوا مؤتمنين عالوصية. وسوا رح نكون ع خط إنمائي واحد. سوا رح نعلي بوابات زحلة. ولمن عم ندعيكن للتصويت للائحة: زحلة الامانة بنكون عم نصوت لخيار حر. وحتى ما يتشتت القرار تعوا نتعالى عن التشطيب، ونصوت للكل. بدنا منكن 21 تحية بالصندوقة الانتخابية".

ثم أعلن أسماء مرشحي لائحة "زحلة الأمانة" وهم: يوسف السكاف رئيسا، والأعضاء: ادوار حاتم، المهندس نديم أبو ديب، سامي التيني، رولا غنطوس أبو خاطر، المحامية ايليز اسطفان تامر، المهندس هشام جحا، كميل جريصاتي، المحامي عبدو حسنه، المهندس بيار روحانا، الدكتور ادوار زعتر، نادر زين الدين، المهندس طوني ساسين، الياس شمعون، ايلي طراد، المهندس جوزف قبلان، المحامي يوسف قرعوني، الياس مشعلاني، المهندس جوسان معلوف، الدكتور سمير ملو، والمحامي وديع نمير.

برنامج اللائحة

وتلا رئيس لائحة "زحلة الأمانة" للانتخابات البلدية، يوسف سكاف، برنامج اللائحة، مستهلا كلامه بالقول: "إن استحقاق الثامن من ايار، ليس مجرد انتخابات بلدية، تخوضها زحلة كمعركة سياسية، أو إنمائية، أو خدماتية فحسب. بل هو أولا وآخرا معركة كرامة هذه المدينة بكل أحيائها وعائلاتها. معركة المحافظة على قرار زحلة لأبناء زحلة، وعلى خصوصية المدينة وتنوعها وقرارها الجامع الموحد".

أضاف "أنتم أبناء قرار زحلة الواحد، والطريق الواحد والهدف الواحد. فإذا لم تصنعوا انتم بأنفسكم هذا القرار، وهذا الطريق، وهذا الهدف، فلن يصنعه لكم أحد. نحن على يقين ان زحلة تستحق ان نبذل من اجلها كل التضحيات، كي تبقى عروس البقاع ورائدة الانماء في لبنان. وقد جسدنا طموحاتكم في البلدية القادمة، ببرنامج إنمائي يعبر عن رغبة أبناء زحلة في مقاربة شؤون مدينتهم ضمن رؤية مستقبلية، تعمم تجربة الإنماء المتوازن من حدود نطاقنا البلدي، في الكرك ووادي العرايش وتويتة الكرمة، وتعنايل الى كافة الاحياء الداخلية، وهذه الرؤية تتحقق عبر المشاريع التالية:

على المستوى الصحي والبيئي:

- تشجيع استعمال الطاقة البديلة على كافة الصعد.
- متابعة تطوير المطمر الصحي بواسطة الهبات العينية، التي جهدت البلدية وحصلت عليها من المملكة المتحدة، ومن الاتحاد الأوروبي، ليتطابق مع أحدث المعايير الدولية وإنتاج أفضل الأسمدة العضوية.
- تنفيذ الدراسة الموضوعة من قبل البلدية لفرز النفايات من المصدر.
- تشغيل محطة التكرير، التي انتهى إنشاؤها مؤخرا، بقرض من الدولة الإيطالية، وذلك بهدف الحد من تلوث الليطاني.
- المتابعة مع مجلس الإنماء والإعمار، المسؤول عن هذا المشروع، لإنجاز خط الصرف الصحي لقاع الريم وحزرتا، لرفع التلوث عن نهر البردوني، ملهم الشعراء والأدباء، وأهم مرفق سياحي في زحلة.
- تحديث المسلخ وجعله يتناسب مع المعايير العالمية.
- وضع دراسة شاملة لتعديل التصنيف في عقارات النطاق البلدي، لإبعاد المناطق الصناعية عن المناطق السكنية.
- تجميل مدينة زحلة بواسطة حملات تشجير وإنشاء حدائق عامة وزيادة المناطق الخضراء.

على مستوى الإعمار والبنى التحتية:

- تنفيذ الدراسة المنجزة لمشروع ترقيم الشوارع والأبنية، تسهيلا لوصول الزائرين والسياح.
- وضع موضع التنفيذ مشروع المراقبة الالكترونية بالكاميرات، للحفاظ على الامن وتنظيم السير.
- انشاء مواقف للسيارات، بعد ان تم استملاك عدة عقارات، لإنشاء مواقف للسيارات في أحياء: حوش الأمراء، مار مخايل ومار جرجس، حوش الزراعنة، شارع البربارةالتجاري، مار الياس وسوق البلاط. وسنباشر بتلزيم الدراسات لهذه المواقف وتشييدها. وبالتوازي، سيتم استملاك عقارات أخرى مناسبة في بقية الأحياء، لتسهيل حركة المرور فيها والتخفيف من احتقان السير.
- التعاون مع جمعيتي التجار في زحلة والمرافق المختصة لوضع برامج لاستقطاب الزبائن الى الأسواق التجارية.
- السعي إلى ربط النطاق البلدي بالأوتوستراد العربي، الذي يسهل التواصل المحلي والإقليمي والتبادل الاقتصادي عبر مسلكين:
1- وصلة حوش الأمراء أراضي- تعنايل، لتسهيل تسفير البضائع المنتجة الى الدول العربية او باتجاه العاصمة وتسهيل تنقل المواطنين.
2- وصلة أراضي زحلة- التويتة- جديتا، لتسهيل انتقال المواطنين من والى زحلة بطريقة آمنة وسريعة خالية من الازدحام.
- استكمال تنفيذ ترميم القصر البلدي.
- تحديث وتفعيل المكننة في البلدية، لتسهيل أمور المواطنين.
- تفعيل دور الشرطة البلدية وتأهيل عناصرها بالتجهيزات اللازمة لأداء وظائفها.
- البدء بتزفيت الطرقات ضمن النطاق البلدي، بعد ان استكمل الملف العائد له.
- متابعة التعاون مع الهيئات الأهلية والشبابية والثقافية والجامعية والرياضية لوضع مشاريع ورؤية إنمائية مستقبلية، تتوافق مع تطلعاتهم ومع تطورات العصر.
- إقامة حلقات بالتعاون مع المدارس الرسمية والخاصة، لتوجيه التلامذة قبل وبعد الشهادة المتوسطة، والاستعانة بذوي الخبرة في هذا المجال، من أجل التوجيه الأمثل للطلاب، بغية الاستفادة من طاقاتهم ومتابعة تحصيلهم العلمي.
- بعد ان تم ضم بلدة تعنايل إلى بلدية زحلة- معلقة، سنعمد وفقا لحاجاتها إلى تحسين مرافقها العامة كافة، من بنى تحتية وإنارة وطرق وتعبيد...

على مستوى السياحة والثقافة:

- الحفاظ على ثروة زحلة في التراث المعماري، وحمايتها مع خصائصها القرميدية والنقوش الحجرية.
- تشييد المركز الثقافي على العقار المجاور لبارك جوزف طعمة سكاف، بالتعاون مع وزارة الثقافة، وفقا للدراسة الأولية، التي أعدت من قبل المهندسة دوللي الدبس.
- تجميل مدخل مقاهي البردوني.
- أما في السياحة، بعد ان كرست زحلة كمدينة سياحية، وأخذت موقعها على الخريطة العالمية، كونها منذ سنة 2012، هي عضو دائم، ولتاريخه المدينة الوحيدة في الشرق الأوسط في شبكة "الأونيسكو" للمدن الخلاقة (UNESCO Creative Cities Network).
- تسعى البلدية المقبلة لوضع زحلة على الخريطة السياحية في لبنان، وذلك من خلال حملة إعلانية وإعلامية ضخمة على مدار السنة، ولا سيما قبل حلول موسم الصيف من كل عام.
- الارتقاء بمهرجانات زحلة إلى مستوى المهرجانات اللبنانية الدولية الأخرى، وذلك بالتنسيق مع وزارة السياحة.
- إعداد وتنظيم واستقبال مؤتمرات محلية ودولية، وتسهيل انعقادها بما ينشط الحركة الثقافية والسياحية، خلال موسمي الشتاء والصيف، ليكون في مدينتنا حركة دائمة على مدار السنة.
- بعد ان انتهت عملية الاستملاكات في محيط سوق البلاط الأثري، سيتم الانتهاء من إنجازه وفق الدراسة الموضوعة، مما يمثل الوجه التراثي الحقيقي لمدينة زحلة.
- تعزيز العلاقات القائمة بين البلدية والاتحاد الأوروبي والولايات المتحدة ودول الانتشار اللبناني.
- العمل على متابعة وتقوية برامج تدريس اللغات الأجنبية، التي باشرت بلدية زحلة - المعلقة وتعنايل تنظيمها، منذ أكثر من أربع سنوات، بالتعاون مع البعثة الثقافية الفرنسية ومع السفارة الأميركية وجمعيات أهلية.

وختم "يا أهلنا في زحلة: إن يوم الثامن من ايار هو يومكم، يوم الشعب: الشعب ينتخب، الشعب يقرر، الشعب مصدر كل السلطات. ان الورقة التي ستضعونها في هذا اليوم في صناديق الاقتراع، هي ورقة الإيمان بزحلة، والإيمان بالبقاع، والإيمان بلبنان. فانزلوا بكثافة واقترعوا للائحة "زحلة الأمانة"، التي شكلت في زحلة ومرجعيتها زحلة، وقرارها زحلي صرف، كي تبقى لنا زحلة، واحة سلام وأمان واستقرار وقيم وبيئة صحية، ومدينة رائدة في الانفتاح على الجوار، كي يبقى للشباب الأمل بغد مشرق وزاهر".